WHAT ABOUT ‘ FLAG ‘ MOVIE SAY…

‘ ஃப்ளாக் ‘ படம் சொல்ல வர்றது இதுதான்…’

வழக்கமான மசாலா படமாக இல்லாமல், வேறு ஒன்றாக ஒரு படம் அமைந்துவிட்டாலே மக்களின் கவனத்தைப் பெற்று விடும். அந்த வகையில் ‘ஃப்ளாக்’ படம் வந்திருக்கிறது.

‘ஃப்ளாக்’ என்றால் கொடி என்பது நாம் எல்லோருமே அறிந்ததுதான். இதில் தேசியக் கொடியையும், நாட்டுப்பற்றையும் சொல்லும் விதத்தில் படம் அமைந்திருக்கிறது. படத்தின் மெயின் கேரக்டரே குட்டி தனுஷ் தீஹான்தான். 10 வயது சிறுவனான அவனுடைய கனவு மற்றும் துணிச்சல், போராட்டம்… கடைசியில் எண்ணம் நிறைவேற்றம்தான் படத்தின் கதை.

திரைக்கதை, வசனமெழுதி இயக்கி இருப்பதுடன் ஒளிப்பதிவையும் கவனத்திருக்கிறார், எஸ்.பி. பொன்சங்கர். கன்னியாகுமரியில் ஆரம்பித்து இந்தியாவின் பல்வேறு பகுதிகளில் ராஜஸ்தான், ஐதராபாத், மும்பை, டெல்லி, குஜராத் உள்ளிட்ட பகுதிகளை அழகாக படம் பிடித்து காட்டியிருக்கிறார்கள். ஆனால், அந்தந்த பகுதிகளை இன்னும் கொஞ்ச நேரம் காட்ட மாட்டார்களா… என்கிற ஏக்கத்தை வெளிப்படுத்தும் விதமாக ஒவ்வொரு லொகேஷனையும் சிறிது நேரம்தான் கட்டியிருக்கிறார்கள்.

‘ஃப்ளாக்’ தேசியக் கொடியின் பெருமையை சொல்லும் படம் மட்டுமல்ல; குழந்தைகளுக்கு இந்தியாவைப் பற்றி சொல்லும் படமாகவும் அமைந்துள்ளது. முஸ்லிம்களை தீவிரவாதிகளாக காட்டுவதும் மற்ற மொழிகளின் திணிப்பும், இந்து மத ஆதரவான காட்சிகளும் படத்தில் நிறைந்துள்ளது. இந்தி மொழிக்கு ஆதரவு என்று மட்டுமல்லாமல், எல்லா மொழிகளும் தேவை என்று பொத்தாம் பொதுவாக சொல்லி, இந்தி மொழி சப்போர்ட்டை மறைமுகமாக வெளிப்படுத்தி இருக்கின்றனர்.

அப்பா, அம்மாவை ஒரு விபத்தில் பறிகொடுத்து விடும் சிறுவன் தீஹானுக்கு பெங்களூரில் வசிக்கும் அவனது தாத்தாவின் அரவணைப்பு கிடைக்கிறது. அவரின் உடல் நிலையும் பாதிக்கப்படுகிறது. அவர் உடல்நிலை நலிவுறுவதற்கு முன், ஹூப்ளி அருகேயுள்ள,தான் வேலை பார்க்கும் தேசியக்கொடி தயாரிக்கும் ‘காதி பவனுக்கு’ சிறுவனை அழைத்துப் போகிறார். ” இங்கு தயாராகும் தேசியக் கொடிகள் தான் நாடு முழுமைக்கும் சப்ளை ஆகிறது என்றும், என்றாவது ஒருநாள் டெல்லி இந்தியா கேட்ல இந்த தேசியக்கொடி ஏற்றுவதை நேரடியாக தான் பார்க்க வேண்டும் என்பது தனது லட்சியம் “என்கிறார். ஆனால் அவருக்கோ பக்கவாதம் வந்து படுக்கையில் இருக்கிறார். தாத்தாவின் கணவையும், லட்சியத்தையும் தனதாக்கி அவர் கணவை நிறைவேற்ற புறப்படுகிறான் சிறுவன் தீஹான்.

விவரம் தெரியாமல் மும்பை ‘ கேட் வே ஆஃப் இந்தியா ‘வுக்கு போகிறான். அப்புறம்தான் தெரிகிறது இந்தியா கேட் டெல்லியில் இருக்கிறது என்பது. அங்கு அவனால் செல்ல முடிந்ததா தேசியக் கொடி அங்கு ஏற்றுவதை பார்க்க முடிந்ததா… என்பது கதை. பையன், தனி ஆளாக போவதெல்லாம் நம்ப முடியாததாக இருந்தாலும் வழியில் நல்லவர்களையும் பார்க்கிறான்.. கெட்டவர்களையும் பார்க்கிறான்.. என்று கதை அமைத்திருக்கிறார்கள். அவதிக்கு உள்ளாகும் இளம் பெண் ஒருத்தியையும் பார்க்கிறான். அவளுக்கு இவனும், இவனுக்கு அவளும் பரஸ்பர உதவிகள் செய்து கொள்கின்றனர்., என்பதெல்லாம் சினிமாட்டிக்காக காண்பிக்கப்பட்டிருக்கிறது.

நேரடியாக இல்லாமல் மறைமுகமாக பி.ஜே.பி-யின் ஆதரவுப் படம் தான் இந்த ‘ ஃபிளாக் ‘.-ராமு சரவணா